Эрон ядровий қуролга эга бўлишига ҳеч қачон йўл қўймаймиз — Трамп
АҚШ президенти Эроннинг юқори даражада бойитилган уран захираларини келишувга эришилган тақдирда ҳам, келишув бўлмаган ҳолатда ҳам назорат остига олиши ва йўқ қилишини маълум қилди.
АҚШ президенти Доналд Трамп NBC News телеканалига берган интервюсида Эрон билан эҳтимолий ядровий келишув бўйича Вашингтоннинг позициясини кескинроқ шаклда баён қилди. У АҚШ Эроннинг юқори даражада бойитилган уран захираларини “келишув бўлса ҳам, бўлмаса ҳам” назорат остига олиши ва йўқ қилишини маълум қилган.
“Агар келишувга эришсак ва муносабатларни йўлга қўйсак, буни биргаликда амалга оширамиз. Уранни олиб ташлаймиз ва уни жойида ёки ташқарида йўқ қиламиз. Ва биз у ерга улар билан ёки уларсиз борамиз”, деган Трамп.
У, шунингдек, келишув бўлмаган тақдирда АҚШ Эронга нисбатан “жуда қаттиқ ҳарбий зарба” беришга тайёрлигини айтган.
Трамп Эроннинг амалдаги раҳбарияти аввалгисига қараганда “оқилона ва жуда ақлли” эканини айтган ҳамда Олий раҳбар Можтабо Хоманаий эҳтимолий келишувни тасдиқлаш жараёнида “иштирок этаётганини” билдирган. У янги раҳбар билан тўғридан тўғри мулоқот қилишга тайёрлигини ҳам қўшимча қилган.
“Ёшроқ. Менимча, оқилонароқ. У яраланган, жиддий яраланган. Шундай бўлса ҳам АҚШ билан ишлар қандай кетаётганини сўраяпти — бунда маълум жасорат бор”, дея таъкидлаган Трамп.
АҚШ президенти Эроннинг ракета ва дрон салоҳияти ҳақида ҳам кескин даъво қилган:
“Биз уларнинг ҳарбий кучларини бутунлай йўқ қилдик. Уларда бир нечта ракеталар қолди. Бир нечта дронлар”, деди Трамп ва Эрон урушдан олдинги ракета захирасининг атиги “21–22 фоизи” қолганини тахмин қилган.
Трамп Эрон билан келишувга “жуда яқин” қолинганини айтган, бироқ Вашингтон энди фақат “ядровий қурол ишлаб чиқармаслик” эмас, балки ядровий қуролни сотиб олмаслик, бойитилган уранни топшириш ва Ҳормуз бўғози бўйича қўшимча мажбуриятларни ҳам талаб қилмоқда. Теҳрон эса музлатилган активларни ечиш ва айрим қатъий талабларнинг юмшатилишини келишув учун муҳим шарт деб ҳисобламоқда.
