Евроиттифоқ россияликлар учун Шенген визаси тартибини кучайтирмоқда

 

Европа Комиссияси Россия фуқароларига Шенген визаларини бериш тартибини янада кучайтириш бўйича янги чораларни ишлаб чиқаётганини маълум қилди. Мазкур ташаббус Евроиттифоқнинг қатор давлатлари томонидан билдирилган мурожаатлардан сўнг илгари сурилмоқда. Бу ҳақда Euronews хабар берди.

 

Еврокомиссиянинг миграция масалалари бўйича вакили Маркус Ламмертнинг билдиришича, хавфсизликка оид таҳдидларни ҳисобга олган ҳолда учинчи давлатларнинг душманона ҳаракатларига қарши мақсадли визавий чекловлар жорий этилиши режалаштирилмоқда. Янги қоидалар 2027 йилдан кучга кириши мумкин.

 

Айни пайтда визалар бериш масаласи Евроиттифоқнинг алоҳида аъзо давлатлари ваколатига кириши сабабли Россия фуқароларига виза беришни тўлиқ тақиқлаш масаласи кўриб чиқилмаётгани қайд этилган.

 

Аввалроқ Шенген ҳудудига кирувчи 11 давлат — Дания, Исландия, Латвия, Литва, Нидерландия, Норвегия, Полша, Финляндия, Чехия, Швеция ва Эстония Европа Комиссиясига қўшма мурожаат йўллаб, Россия фуқароларига визалар бериш бўйича янада қатъий ва мажбурий чекловлар жорий этишни талаб қилган эди.

 

Мурожаатда Евроиттифоқ тавсиялари турли мамлакатларда турлича қўлланаётгани, бу эса Россия фуқароларига туристик ва бошқа мақсадларда визалар берилишида сезиларли тафовутларни келтириб чиқараётгани таъкидланган.

 

Маълумотларга кўра, Франсия, Италия ва Испания Россия фуқароларига туристик визалар беришни давом эттирмоқда. 2025-йилда Франсия қарийб 180 минг, Италия 160 мингга яқин ва Испания 100 мингга яқин виза расмийлаштирган.

 

Шунингдек, мурожаатда россияликларга кўп марталик визалар бериш тартибини янада қатъийлаштириш ҳамда Украинадаги урушда қатнашган амалдаги ва собиқ ҳарбийларнинг Евроиттифоқ ҳудудига киришини чеклаш таклифлари ҳам илгари сурилган.