Навоийда Tico ва юк машинаси тўқнашиб, бир киши ҳалок бўлди
Tico ҳайдовчиси иккинчи даражали йўлдан чиқиб келиб, асосий йўлдаги транспорт воситасига йўл бермагани оқибатида ЙТҲ содир бўлган.
Навоий вилоятининг Нурота туманида Tico ва Sinotruk русумли юк машинаси иштирокида содир бўлган йўл-транспорт ҳодисаси оқибатида бир киши вафот этди. Бу ҳақда вилоят Йўл ҳаракати хавфсизлиги бошқармаси маълум қилди.
Маълумотларга кўра, ҳодиса 3 июнь куни соат 08:30 атрофида “Тинчлик” маҳалла фуқаролар йиғини ҳудудидан ўтувчи Д-191 Қизилқум ҳалқа автомобиль йўлининг 86-километрида юз берган.
Аниқланишича, Tico ҳайдовчиси иккинчи даражали йўлдан чиқиб келиб, асосий йўлдаги транспорт воситасига йўл бермаган ва Sinotruk юк машинаси билан тўқнашган. Оқибатда енгил автомобиль Sinotruk русумли юк машинаси билан тўқнашган.
ЙТҲ натижасида Tico ҳайдовчиси оғир тан жароҳатлари олиб, туман касалхонасининг жонлантириш бўлимига ётқизилган. Бироқ шифокорлар томонидан кўрсатилган тиббий ёрдамга қарамай, унинг ҳаётини сақлаб қолишнинг имкони бўлмаган.
Ҳодисадан сўнг маҳалла аҳолиси билан учрашув ўтказилиб, йўл ҳаракати хавфсизлигини таъминлаш масалалари муҳокама қилинди.
Шунингдек, сайёр қабул давомида фуқаролар томонидан билдирилган йўл инфратузилмасини яхшилашга оид таклифларни амалга ошириш юзасидан масъулларга тегишли топшириқлар берилди.
