Трамп Эрон АҚШ ҳарбий вертолётини уриб туширганини маълум қилди

АҚШ президенти Доналд Трамп Эронни Ҳормуз бўғози устида патруллик қилаётган АҚШнинг Apache ҳарбий вертолётини уриб туширишда айблади ва Вашингтон бу ҳодисага жавоб қайтаришини маълум қилди. Бу ҳақда Al Jazeera хабар берди.

 

Трампнинг сўзларига кўра, ҳодиса кеча тунда содир бўлган. Вертолёт бортида бўлган икки нафар учувчи қутқариб олинган ва жароҳатланмаган. АҚШ Марказий қўмондонлиги (CЕNТCОМ) ҳодиса юзасидан текширув олиб борилаётганини билдирган. 

 

Ҳарбийлар маълумотига кўра, экипаж аъзолари тахминан икки соат ичида хавфсиз тарзда қутқарилган.

 

Мазкур воқеа АҚШ ҳарбийлари Форс кўрфазида Эроннинг бир неча нефть танкерларини ҳаракатсиз ҳолатга келтирганини маълум қилганидан бир кун ўтиб юз берди.

 

Шунингдек, сўнгги кунларда Эрон ва Исроил ўртасида ҳам ўзаро ҳужумлар қайд этилди. Эрон Байрутга уюштирилган зарбаларга жавобан Исроил ҳудудига ракеталар учирган бўлса, Исроил Эрон ичкарисидаги нишонларга зарбалар берган.

 

Кузатувчилар таъкидлашича, ушбу воқеалар 8 апрель куни кучга кирган ва АҚШ-Исроил ҳамда Эрон ўртасидаги ҳарбий қарама-қаршиликларни тўхтатишга қаратилган сулҳга босимни кучайтирмоқда.

 

Эрон расмийлари ҳозирча АҚШ вертолёти уриб туширилгани ҳақидаги даъволарни тасдиқламаган. Шу билан бирга, Теҳрон АҚШнинг Эрон портларига нисбатан ҳаракатлари ва Исроилнинг Ливандаги операциялари сулҳ шартларига зид эканини бир неча бор таъкидлаган.