Ўзбекистон ТИВ хориждаги фуқаролар учун консуллик хизматлари мобил иловасини ишга туширди

 

Ўзбекистон Ташқи ишлар вазирлиги хорижда истиқомат қилаётган ҳамда чет элга сафар қилишни режалаштираётган фуқаролар учун янги консуллик хизматлари мобил иловасини ишга туширди.

 

Мазкур илова консуллик масалаларини масофадан туриб ҳал этиш, зарур маълумотларни тезкор олиш ва давлат хизматларидан қулай фойдаланиш имконини яратиш мақсадида ишлаб чиқилган.

 

Илова орқали фойдаланувчилар Ўзбекистоннинг хориждаги барча дипломатик ваколатхоналари ва консуллик муассасаларининг манзили, геолокацияси ҳамда алоқа маълумотларини бир жойда топишлари мумкин. Шунингдек, махсус “Консуллик округлари” функцияси ёрдамида қайси давлат ёки ҳудуд учун масъул дипломатик ваколатхона хизмат кўрсатишини аниқлаш имконияти яратилган.

 

Янги платформа орқали фуқаролар айрим консуллик хизматларига масофадан мурожаат қилишлари мумкин. Жумладан, Ватанга қайтиш сертификатини расмийлаштириш, вақтинчалик ва доимий консуллик ҳисобига туриш бўйича аризаларни электрон шаклда юбориш имконияти мавжуд. Вазирлик келгусида хизматлар рўйхатини босқичма-босқич кенгайтиришни режалаштирмоқда.

 

Шунингдек, иловада ариза ва анкеталарни тўлдириш жараёнини енгиллаштирувчи автоматик маълумот киритиш тизими жорий этилган бўлиб, у мажбурий майдонларнинг қарийб 80 фоизини автоматик тўлдириш имконини беради.

 

Бундан ташқари, иловага хорижий давлатларга кириш учун виза талаблари бўйича маълумот берувчи махсус ахборот бўлими ҳам қўшилган. Ҳозирда ушбу хизмат синов режимида ишламоқда ва маълумотлар базаси мунтазам равишда янгиланиб борилади.

 

ТИВ маълумотига кўра, мобил илова барча фойдаланувчилар учун бепул тақдим этилади.