Покистон Афғонистонга қарши янги ҳужумларни бошлади
Ҳаво зарбалари оқибатида 13 киши, жумладан 11 бола ҳалок бўлгани билдирилди.
Афғонистон расмийлари Покистонни мамлакатнинг шарқий ҳудудларига янги ҳаво ҳужумлари уюштиришда айблади. Афғонистон Олий раҳбари матбуот котиби Забиҳуллоҳ Мужоҳиднинг маълум қилишича, ҳужумлар оқибатида 13 киши ҳалок бўлган, улардан 11 нафари болалардир.
Билдирилишича, зарбалар Кунар, Хост ва Пактика вилоятларидаги тинч аҳоли яшаш манзилларига берилган. Ҳодиса оқибатида яна 14 киши турли даражадаги тан жароҳатлари олган.
Забиҳуллоҳ Мужоҳид Покистон армиясини Афғонистон ҳаво ҳудудини бузишда айблаб, мазкур ҳаракатни қоралаган. Унинг таъкидлашича, ҳужумлар тинч аҳолига қаратилган бўлиб, Афғонистон томони буни “гуманитар жиноят” сифатида баҳоламоқда.
Шу билан бирга, Покистон расмийлари ҳозирча Афғонистон ҳудудига зарбалар берилгани юзасидан расмий баёнот берганича йўқ.
Эслатиб ўтамиз, Афғонистон ва Покистон ўртасида чегара ҳудудларида бир неча бор қуролли тўқнашувлар кузатилган.
