Сирдарёда чиябўри тўрт фуқарога ҳужум қилди
Ҳодиса юзасидан тегишли ташкилотлар томонидан ўрганиш ишлари олиб борилмоқда.
Сирдарё вилоятининг Гулистон туманида чиябўри ҳужуми оқибатида тўрт нафар фуқаро жароҳат олди. Бу ҳақда вилоят ҳокимлиги матбуот хизмати маълум қилди.
Қайд этилишича, ҳодиса 9 июн куни соат тахминан 17:30 да Гулистон туманининг “Ишонч” маҳалласи дала четига яқин ҳудудида содир бўлган. Ёввойи ҳайвон тўрт нафар фуқарога ҳужум қилган.
Ҳодиса вақтида маҳаллада яшовчи фуқаролардан бири томонидан тезкор чоралар кўрилиб, чиябўри зарарсизлантирилган ва мавжуд хавф бартараф этилган.
Жароҳатланган фуқароларга зудлик билан тиббий ёрдам кўрсатилган. Ҳозирда улар шифокорлар назорати остида бўлиб, саломатлик ҳолати қониқарли экани билдирилмоқда.
Мазкур ҳолат юзасидан тегишли ташкилотлар томонидан ўрганиш ва профилактик тадбирлар олиб борилмоқда. Вазият мутасадди идоралар назоратига олинган.
