Ўзбекистонда экологлар ва фаолларнинг атроф-муҳитни муҳофаза қилишдаги ҳиссаси эътироф этилди

 

Экология ва иқлим ўзгариши миллий қўмитасида Бутунжаҳон атроф-муҳит куни муносабати билан “Табиат ҳимоячиси” кўкрак нишонини топшириш маросими бўлиб ўтди.

 

Тақдирлаш маросимида мукофотларни Ўзбекистон Республикаси Президентининг экология масалалари бўйича маслаҳатчиси, Экология ва иқлим ўзгариши миллий қўмитаси раиси Азиз Абдуҳакимов топширган.

 

Тадбирда Қўмита марказий аппарати, тизим ташкилотлари ва ҳудудий бўлинмаларининг фаол ходимлари, ҳамкор ташкилотлар вакиллари, оммавий ахборот воситалари ходимлари ҳамда экологик фаоллар иштирок этган.

 

Маросим давомида сўзга чиққан Азиз Абдуҳакимов сўнгги йилларда Ўзбекистонда экологик хавфсизлик ва атроф-муҳитни муҳофаза қилиш давлат сиёсатининг устувор йўналишларидан бирига айланганини таъкидлади. Шунингдек, мамлакат экологик муаммоларни ҳал этишда халқаро ҳамкорликни кенгайтиришга алоҳида эътибор қаратаётгани қайд этилган.

 

Таъкидланишича, жорий йил 31 май – 6 июн кунлари Самарқанд шаҳрида Глобал экологик фонднинг VIII Ассамблеяси ҳамда “Eco Expo Central Asia 2026” халқаро кўргазмасининг муваффақиятли ўтказилгани Ўзбекистоннинг экологик технологиялар, инвестициялар ва илғор тажриба алмашинувидаги мавқеини янада мустаҳкамлаган.

 

Қўмита раиси Бутунжаҳон атроф-муҳит куни ҳар бир инсоннинг келажак авлодлар олдидаги масъулиятини эслатиб турувчи муҳим сана эканини қайд этиб, фуқароларни экологик ташаббусларда фаол иштирок этишга чақирган.

 

Маросим якунида “Табиат ҳимоячиси” кўкрак нишони билан Экология қўмитаси тизимидаги ходимлар, ҳамкор ташкилотлар, илмий муассасалар, маданият ва жамоат ташкилотлари вакиллари, экофаоллар ҳамда ОАВ ходимлари тақдирланган.

 

Маълум қилинишича, 2026 йилда республика бўйлаб атроф-муҳитни муҳофаза қилиш, экологик маданиятни ривожлантириш ва барқарор ривожланиш ғояларини тарғиб этишга муносиб ҳисса қўшган жами 169 нафар фуқаро “Табиат ҳимоячиси” кўкрак нишони билан мукофотланган.