Шавкат Мирзиёев Қатар Амирига портлаш қурбонлари муносабати билан таъзия йўллади
Қатарда газ мажмуасидаги портлаш оқибатида камида 13 киши ҳалок бўлган.
Ўзбекистон Президенти Шавкат Мирзиёев Қатар Давлати Амири Тамим бин Ҳамад Ол Сонийга Рас-Лаффан саноат зонасидаги газни қайта ишлаш мажмуасида содир бўлган кучли портлаш ва ёнғин оқибатида кўплаб инсонлар ҳалок бўлгани ҳамда жиддий жароҳат олгани муносабати билан таъзия йўллади.
Таъзия мактубида давлат раҳбари ҳалок бўлганларнинг оила аъзолари ва яқинларига чуқур ҳамдардлик билдириб, жабрланганларнинг тез фурсатда соғайиб кетишини тилаган.
Қатарнинг Рас-Лаффан саноат ҳудудидаги газ экспорти мажмуасида юз берган портлаш ва ёнғин оқибатида камида 13 киши ҳалок бўлди, яна 66 киши жароҳатланди.
Маълум қилинишича, ҳодиса ишчилар Эрон ҳужумлари сабаб тўхтатилган объект фаолиятини қайта тиклашга уринаётган пайтда содир бўлган. QatarEnergy компаниясига кўра, портлаш Барзан газ таъминоти мажмуасида юз берган.
Қатар энергетика вазири Саад Шерида ал-Каабийнинг айтишича, ҳодиса саботаж ёки бошқа душманона ҳаракатлар билан боғлиқ эмас. Ҳалок бўлганлар Ҳиндистон ва Покистон фуқаролари бўлса, жароҳатланганлар орасида Қатар ҳамда Африка ва Осиёнинг турли давлатлари фуқаролари бор.
Қайд этилишича, Қатар дунёдаги йирик табиий газ ишлаб чиқарувчилардан бири ҳисобланади. Шу боис Рас-Лаффандаги портлаш глобал энергия бозорларига ҳам таъсир кўрсатиши мумкинлиги қайд этилмоқда.
Март ойида Эрон ракетаси Рас-Лаффан ҳудудига келиб тушиб, ёнғин келиб чиққан ва объектга катта зарар етган эди. Шундан сўнг Қатар мазкур ҳудуддаги ишлаб чиқаришни тўхтатган.
