Тошкентдаги “Ўрикзор” бозорида ёнғин содир бўлди
Ҳозирда ёнғин сабаби ва келтирилган моддий зарар миқдори аниқланмоқда.
Бугун, 4 июль куни Тошкент шаҳрининг Учтепа туманида жойлашган «Ўрикзор» бозоридаги дўконлардан бирида ёнғин юз берди.
Тошкент шаҳар Фавқулодда вазиятлар бош бошқармаси маълумотига кўра, ҳодиса юзасидан чақирув соат 04:26 да келиб тушган. Ёнғин-қутқарув экипажлари воқеа жойига соат 04:35 да етиб бориб, ёнғинни 04:48 да қуршаб олган ҳамда 05:01 да тўлиқ бартараф этган.
Дастлабки маълумотларга кўра, ёнғин оқибатида озиқ-овқат дўконининг тахминан 150 квадрат метр майдони ёниб зарарланган.
Қайд этилишича, ҳодиса оқибатида жабрланганлар йўқ.
Айни пайтда ёнғиннинг келиб чиқиш сабаблари ҳамда етказилган моддий зарар миқдорини аниқлаш ишлари олиб борилмоқда.
