Шайхонтоҳур туманидаги икки қаватли дўконда ёнғин содир бўлди
Ёнғин оқибатида дўконнинг иккинчи қаватидаги ички қисми зарарланган. Ҳодиса оқибатида тан жароҳати олган ёки ҳалок бўлганлар йўқ.
5 июль куни соат 21:15 атрофида Тошкент шаҳрининг Шайхонтоҳур тумани Бешқўрғоч кўчасида жойлашган икки қаватли дўконнинг иккинчи қаватида ёнғин содир бўлди. Бу ҳақда Тошкент шаҳар Фавқулодда вазиятлар бош бошқармаси маълум қилди.
Хабарга кўра, воқеа жойига ёнғин-қутқарув экипажлари соат 21:24 да етиб борган. Ёнғин қисқа вақт ичида қуршаб олиниб, соат 21:34 да тўлиқ бартараф этилган.
Дастлабки маълумотларга кўра, ёнғин оқибатида дўконнинг иккинчи қаватидаги ички қисм 80 квадрат метр майдонда ёниб зарарланган.
Ҳодиса оқибатида тан жароҳати олган ёки ҳалок бўлганлар йўқ. Ёнғиннинг келиб чиқиш сабаби ва етказилган моддий зарар миқдори аниқланмоқда.
