Ўзбекистонда меҳнат низоларини кўрувчи ихтисослашган судьялар фаолияти йўлга қўйилади

2026 йил 1 августдан бошлаб Ўзбекистонда фуқаролик ишлари бўйича судларда меҳнат низоларини кўришга ихтисослашган судьялар фаолият бошлайди. Бу ҳақда Олий суд Раёсатининг тегишли қарорида белгиланди.

 

Қарорга кўра, фуқаролик ишлари бўйича судларнинг мавжуд штат бирликлари доирасида меҳнат низоларини кўрувчи алоҳида судьялар корпуси шакллантирилади.

 

Унга мувофиқ, Олий суднинг Фуқаролик ишлари бўйича судлов ҳайъатида 4 нафар, Қорақалпоғистон Республикаси суди, вилоятлар ва Тошкент шаҳар судларининг фуқаролик ишлари бўйича судлов ҳайъатларида эса 3 нафардан ихтисослашган судья фаолият юритади.

 

Шунингдек, Нукус, Бухоро, Жиззах, Қарши, Кармана, Наманган, Термиз, Оҳангарон, Фарғона ва Урганч туманлараро судларида 2 нафардан судья меҳнат низоларини кўришга ихтисослаштирилади. Самарқанд шаҳар суди ҳамда Тошкент шаҳрининг Мирзо Улуғбек, Миробод, Шайхонтоҳур, Учтепа ва Яккасарой туманлараро судларида ҳам 2 нафардан шундай судья фаолият олиб боради. Каттақўрғон, Ўртачирчиқ ва Янгийўл туманлараро судларида эса биттадан ихтисослашган судья ишлайди.

 

Қарорга асосан, 2026 йил 1 августдан кейин судларга келиб тушадиган меҳнат низоларига оид аризалар ихтисослашган судьялар ўртасида тақсимланади.

 

Мазкур санага қадар келиб тушган, шу жумладан иш юритувига қабул қилинган фуқаролик ишлари эса аввал амалда бўлган тартиб асосида кўриб чиқилиб, якунланади.