Навоийда 3 киши Зарафшон дарёсига чўкиб кетди
Ҳодиса 8 июль куни содир бўлган. Фуқароларнинг жасади 10 июль куни топилди.
Навоий вилоятининг Кармана туманида Зарафшон дарёсига чўкиб кетган уч нафар фуқаронинг жасади қидирув-қутқарув ишлари давомида топилди. Бу ҳақда вилоят Фавқулодда вазиятлар бошқармаси маълум қилди.
Маълум қилинишича, 8 июль куни соат 13:50 да Зарафшон дарёсининг Кармана тумани "Катта масжид" маҳалласи ҳудудидан оқиб ўтувчи қисмида уч нафар фуқаро чўмилиш учун дарёга кириб, эҳтиётсизлик оқибатида чўкиб кетгани ҳақида ФВБга хабар келиб тушган.
Шундан сўнг воқеа жойига вилоят Фавқулодда вазиятлар бошқармасининг Махсус қутқарув отряди ғаввослари ҳамда бошқа тегишли хизматлар жалб этилган.
Олиб борилган қидирув-қутқарув ишлари натижасида 10 июль куни учала фуқаронинг жасади Зарафшон дарёсининг Кармана тумани ҳудудидан оқиб ўтувчи қисмидан топилди.
Воқеа жойига вилоят ФВБ, туман ИИБ ва прокуратура масъуллари чиққан.
