"Қамчиқ" довонида Lacetti ёниб кетди
Ҳайдовчи бошқарувни йўқотиши оқибатида автомобиль йўл четидаги темир тўсиққа урилган. У ўз вақтида машинани тарк этиб, хавфсиз жойга чиққан.
"Қамчиқ" довонидан ўтувчи А-373 автомобиль йўлида ҳаракатланган Lacetti русумли енгил автомобилда ёнғин содир бўлди. Бу ҳақда “Қамчиқ” махсус қутқарув бошқармаси хабар берди.
Маълум қилинишича, 11 июль куни соат 17:50 да "Қамчиқ" махсус қутқарув бошқармасига "Тошкент–Водий" йўналишида ҳаракатланаётган автомобилда ёнғин чиққани ҳақида хабар келиб тушган.
Дастлабки маълумотларга кўра, ҳайдовчи бошқарувни йўқотиб, автомобиль йўл четидаги темир тўсиққа урилган. Тўқнашув натижасида транспорт воситасининг электр тизимида қисқа туташув юзага келиб, кичик кўламдаги ёнғин келиб чиққан.
Қайд этилишича, автомобилда ёлғиз бўлган ҳайдовчи ўз вақтида машинани тарк этиб, хавфсиз жойга чиққан. Воқеа жойига етиб борган "Қамчиқ" махсус қутқарув бошқармаси ходимлари ёнғинни қисқа фурсатда тўлиқ ўчирган.
Ҳозирда ёнғин келиб чиқиш сабаблари ҳамда етказилган моддий зарар миқдори аниқланмоқда. Ҳодиса оқибатида тан жароҳати олганлар қайд этилмаган.
