Қатарнинг собиқ амири Шайх Ҳамад бин Халифа Ол Соний вафот этди
Мамлакатда тўрт кунлик мотам эълон қилинди. Бир неча давлатлар етакчилари Шайх Ҳамаднинг вафоти муносабати билан таъзия билдирди.
Қатарнинг собиқ амири, мамлакатнинг замонавий тараққиётига асос солган сиёсатчилардан бири Шайх Ҳамад бин Халифа Ол Соний 74 ёшида вафот этди, дея хабар бермоқда Al Jazeera.
Маълум қилинишича, собиқ амир 12 июль тонгида ҳаётдан кўз юмган. Унинг вафоти муносабати билан Қатарда 4 кунлик умумхалқ мотами 13 июлдан бошланади. Шу даврда давлат идоралари ва жамоат ташкилотлари фаолияти тўхтатилади, давлат байроқлари ярим устунга туширилади.
Шайх Ҳамад 1995 йилдан 2013 йилгача Қатарни бошқарган. Унинг раҳбарлиги даврида мамлакат иқтисодий, ижтимоий ва маданий жиҳатдан жадал ривожланиб, дунёдаги энг йирик суюлтирилган табиий газ экспортчисига айланди. Шунингдек, Қатар халқаро майдондаги сиёсий ва иқтисодий таъсирини сезиларли даражада кучайтирди.
Унинг ҳукмронлиги даврида 1996 йилда Al Jazeera ахборот тармоғи ташкил этилди, 2004 йилда эса мамлакатнинг биринчи доимий Конституцияси қабул қилинди. Шу даврда маҳаллий сайловлар жорий этилиб, аёлларга овоз бериш ва номзод сифатида қатнашиш ҳуқуқи берилди.
2013 йилда Шайх Ҳамад ҳокимиятни ўғли Шайх Тамим бин Ҳамад Ол Сонийга топширган эди. Бу Форс кўрфази араб монархиялари тарихида кам учрайдиган ихтиёрий тахтни топшириш ҳолатларидан бири сифатида баҳоланган.
Собиқ амирнинг вафоти муносабати билан Миср президенти Абдулфаттоҳ ас-Сисий, Покистон президенти Осиф Али Зардорий ҳамда БАА президенти Шайх Муҳаммад бин Зоид Ол Наҳаён ҳамдардлик билдириб, унинг Қатар тараққиёти ва минтақавий ҳамкорликни мустаҳкамлашдаги хизматларини эътироф этди.
