Зангиотада кўп қаватли бинодан ўзини ташламоқчи бўлган фуқаро қутқариб қолинди
Фуқаронинг руҳий-асаб касалликлари диспансерида рўйхатда туриши аниқланиб, уни ихтисослаштирилган тиббий муассасага юбориш чоралари кўрилган.
Тошкент вилоятининг Зангиота туманида кўп қаватли савдо мажмуаси томидан ўзини ташламоқчи бўлган 36 ёшли фуқаро ИИБ ходимларини томонидан қутқариб қолинди. Бу ҳақда ИИББ матбуот котиби хабар берди.
Ижтимоий тармоқларда фуқаронинг кўп қаватли бинодан ўзини ташламоқчи бўлгани акс этган видеолар тарқалди.
Маълум қилинишича, ҳодиса 14 июль куни соат 22:20 атрофида Тошкент вилоятининг Зангиота туманидаги кўп қаватли савдо мажмуасининг 10-қаватида содир бўлган.
Воқеа жойига туман Ички ишлар бўлими, прокуратура ҳамда Фавқулодда вазиятлар бўлими ходимлари етиб бориб, фуқарони савдо мажмуасининг 10-қаватидан соғ-саломат ва жароҳатларсиз олиб тушган.
Аниқланишича, фуқаро Қашқадарё вилояти Чироқчи тумани “Чамбил” маҳалласида яшовчи, 36 ёшли Й.Й. бўлиб, у руҳий-асаб касалликлари диспансерида рўйхатда туради.
Ҳолат юзасидан тегишли ҳужжатлар расмийлаштирилган ва фуқарони ихтисослаштирилган тиббий муассасага юбориш чоралари кўрилган.
