Афғонистон вазирлиги Ўзбекистон ҳақидаги баҳсли баёнотларни рад этди — ТИВ

Айрим оммавий ахборот воситаларида Афғонистоннинг фазилатларни тарғиб қилиш ва ёмонликларнинг олдини олиш вазири Холид Ҳанафи Пактиа вилоятига сафари чоғида Ўзбекистоннинг Самарқанд, Бухоро ва Термиз шаҳарларида Ислом фақат номигагина қолганини айтгани ҳақида хабар тарқалган эди. 

 

Мазкур хабарлар ортидан Ўзбекистоннинг Афғонистондаги элчихонаси ҳолатни ўрганиб чиқди. Бу ҳақда Ўзбекистон ТИВ матбуот хизмати хабар берди.

 

Элчихона маълум қилишича, 16 июль куни Кобулдаги дипломатик ваколатхонага Афғонистоннинг Фазилатларни тарғиб қилиш ва ёмонликларнинг олдини олиш вазирлигидан расмий рад этиш хати келиб тушган. Унда айрим доиралар ва оммавий ахборот воситалари икки қардош давлат ўртасидаги ишонч ва яхши қўшничилик муносабатларига путур етказиш мақсадида фактларни бузиб талқин қилаётгани билдирилган. 

 

Баёнотда Ўзбекистон ислом оламининг кўплаб буюк алломалари, жумладан Имом Бухорийнинг ватани экани қайд этилиб, Афғонистон ва Ўзбекистонни чуқур диний, тарихий, маданий ҳамда халқлар ўртасидаги муштарак ришталар боғлаб туриши таъкидланган. 

 

Шунингдек, Ўзбекистон ҳақида салбий мазмунда талқин қилинган баёнотлар ҳақиқатга мутлақо тўғри келмаслиги, бундай даъволар қатъиян рад этилиши ва улар фактларни бузиб кўрсатиш экани қайд этилган. 

 

Вазирлик Афғонистон ва Ўзбекистон ўртасидаги биродарлик, ўзаро ҳурмат ва яхши қўшничилик муносабатлари бундан буён ҳам мустаҳкамланишига ишонч билдирган.