Мексикада 7,3 магнитудали зилзила содир бўлди
Зилзиладан кейин Тинч океани қирғоқларида цунами хавфи бўйича огоҳлантириш эълон қилинган.
Мексиканинг жанубий қирғоқлари яқинида, Теҳуантепек кўрфази ҳудудида 7,3 магнитудали кучли зилзила содир бўлди. Бу ҳақда АҚШ Геологик хизмати (USGS) маълум қилди.
Маълумотларга кўра, зилзила эпицентри Пуэрто Мадеро порт шаҳри яқинида, Ақуилес-Сердан ҳудудидан тахминан 48–58 километр жануби-ғарбда жойлашган. Ер силкинишлари ўчоғи 15–18 километр чуқурликда қайд этилган.
Асосий зилзиладан сўнг ҳудудда 10 дан ортиқ такрорий силкинишлар кузатилди. Уларнинг айримлари 5,1 ва 6,0 магнитудага етган.
Зилзиладан кейин Мексиканинг Тинч океани қирғоқлари ҳамда қўшни Гватемала ҳудудлари учун цунами хавфи бўйича огоҳлантириш эълон қилинган. Бир неча соатдан сўнг огоҳлантириш бекор қилинган.
Мексика президенти Клаудия Шейнбаумнинг маълум қилишича, Чиапас ва Табаско штатлари раҳбарлари билан боғланилган ҳамда ҳозирча қурбонлар ёки жиддий вайронагарчиликлар ҳақида маълумот келиб тушмаган. Айни пайтда маҳаллий ва федерал хизматлар зилзила оқибатларини ўрганишда давом этмоқда.
