Ҳиндистон ва Покистон чегарасида икки соатлик отишма юз берди
Ҳиндистон ҳарбийлари чегарани ноқонуний кесиб ўтишга уринган "террорчилар"ни тўхтатишга уринган.
Ҳиндистон ва Покистон ўртасидаги назорат чизиғида (Line of Control) жойлашган Жамму ва Кашмирнинг Ражаури секторида икки соат давом этган қуролли тўқнашув содир бўлди. Бу ҳақда NDTV телеканалига таяниб РИА Новости хабар берди.
Маълум қилинишича, Ҳиндистон ҳарбийлари чегарани ноқонуний кесиб ўтишга уринган "террорчилар"ни тўхтатишга уринган. Натижада томонлар ўртасида тахминан икки соат давом этган шиддатли отишма юз берган.
NDTV қайд этишича, бу 2025 йил май ойида Ҳиндистоннинг "Синдур" ҳарбий операцияси якунланганидан буён ўт очишни тўхтатиш режими бузилиши билан боғлиқ илк йирик ҳодиса ҳисобланади. Шунга қарамай, ўтган давр мобайнида чегарада кичик кўламдаги отишмалар бир неча бор кузатилган.
Эслатиб ўтамиз, Ҳиндистон ва Покистон ўртасидаги кескинлик 2025 йил апрель ойида Жамму ва Кашмирнинг Паҳалгам шаҳри яқинида содир этилган терактдан сўнг яна кучайган эди. Шундан сўнг Ҳиндистон "Синдур" операциясини бошлаб, Покистон ҳудудидаги "террорчилик инфратузилмаси"га зарбалар берган.
Операция бошланганидан тўрт кун ўтиб, томонлар ҳарбий ҳаракатларни тўхтатиш бўйича келишувга эришган. Бироқ 2026 йил май ойида Ҳиндистон Қуруқлик қўшинлари штаби бошлиғи Упендра Двиведи зарурат туғилса, "Синдур 2.0" операциясини ўтказишга тайёргарлик кўрилаётганини маълум қилган.
