Президент ҳокимларга гўшт импорти бўйича аниқ режа тузишни топширди

Ўзбекистонда гўшт нархини барқарорлаштириш мақсадида импорт гўштни самолётда ташиш харажатларини қоплаш бўйича имтиёз йил якунигача узайтирилади. Шу билан бирга, чорвачиликни ривожлантириш учун қўшимча маблағлар ажратилади. Бу ҳақда Президент Шавкат Мирзиёев раислигида ўтказилган йиғилишда маълум қилинди.

 

Йиғилишда инфляцияни жиловлаш масаласи муҳокама қилиниб, бозорда товар ва хизматлар таклифини кўпайтириш асосий вазифа экани таъкидланди. Қайд этилишича, вилоят ҳокимлари жорий йилнинг январь–июнь ойларида инфляцияни 3 фоиздан оширмасликни режалаштирган бўлса-да, бу кўрсаткичга фақат Самарқанд вилояти эришган.

 

Апрель–июнь ойларида гўшт нархи 6–8 фоизга ошгани сабабли импорт гўштни самолётда ташиш харажатларини қоплаш учун 300 миллиард сўм ажратилган. Пойтахт ва Тошкент вилоятидаги тадбиркорлар ушбу имкониятдан фойдаланиб, 1 минг 300 тонна гўшт олиб келган, бошқа ҳудудларда эса бу борадаги фаоллик етарли бўлмагани қайд этилди.

 

Президент вилоятлар кесимида гўшт балансини қайта кўриб чиқиш, қайси давлатдан ва қачон қанча гўшт импорт қилиниши бўйича аниқ режалар ишлаб чиқиш зарурлигини таъкидлади.

 

Шунингдек, қишлоқ хўжалигини рўйхатга олиш натижалари чорвачиликдаги ҳақиқий ҳолатни очиб бергани маълум қилинди. Унга кўра, аввалги маълумотларга нисбатан қорамоллар сони 2,1 миллион бошга, қўй ва эчкилар эса 1,5 миллион бошга кам экани аниқланган.

 

Чорвачилик лойиҳаларини молиялаштириш учун Қишлоқ хўжалиги жамғармасидан ажратилган 1 триллион сўмга қўшимча равишда Тикланиш ва тараққиёт жамғармасидан яна 50 миллион доллар йўналтирилади.

 

Мазкур маблағлар ҳисобидан чорва комплексларини ташкил этиш учун 5 миллиард сўмгача, наслли қорамолчилик лойиҳалари учун эса 20 миллиард сўмгача 10 фоизлик кредитлар 10 йил муддатга ва 4 йиллик имтиёзли давр билан ажратилади.

 

Йиғилишда йил якунигача хориждан 100 минг бош қорамол ҳамда 150 минг бош қўй ва эчки олиб келиш вазифаси ҳам белгиланди.