Тошкентда Бўзсув каналида бир киши чўкиб кетиб, ҳалок бўлди
Марҳумнинг жасади чўкиб кетганидан қарийб беш соат ўтиб топилди.
Тошкентнинг Юнусобод туманидаги Юқори Бўзсув каналида чўкиб кетган фуқаронинг жасади қидирув ишлари натижасида ҳодиса жойидан тахминан 100 метр узоқликдан топилди.
Тошкент шаҳар Фавқулодда вазиятлар бош бошқармаси маълум қилишича, ҳодиса 21 июль куни соат 14:07 да Юнусобод тумани, Юқори Бўзсув кўчасидан оқиб ўтувчи Юқори Бўзсув каналида содир бўлган.
Дастлабки маълумотларга кўра, фуқаро чўмилиш мақсадида сувга тушган ва эҳтиётсизлиги оқибатида чўкиб кетган.
Воқеа жойига Тошкент шаҳар ФВББ Махсус қутқарув отрядининг ғаввос-қутқарувчилари ҳамда бошқа тегишли хизматлар жалб этилиб, сувда қидирув ишлари олиб борилган.
Қидирув ишлари натижасида фуқаронинг жасади соат 18:35 да чўккан жойидан тахминан 100 метр узоқликдан топилиб, тегишли хизматларга топширилган.
Тошкент шаҳар Фавқулодда вазиятлар бош бошқармаси фуқароларни тақиқланган ҳудудларда чўмилмасликка ҳамда чўмилиш қоидаларига қатъий риоя этишга чақирди.
