Қашқадарёда келинини ўз жонига қасд қилиш даражасига етказган қайнона 5 йилга қамалди
Аёл доимий равишда келинини ҳақорат қилган, калтаклаган ва ота-онаси билан мулоқотини чеклаган.
Қашқадарё вилоятининг Чироқчи туманида келинини мунтазам руҳий ва жисмоний тазйиққа дучор қилиб, уни ўз жонига қасд қилиш даражасига етказган қайнона 5 йил муддатга озодликдан маҳрум этилди.
Суд ҳужжатларига кўра, 47 ёшли аёл 2022 йилдан 2025 йил октябрь ойига қадар келинини уй юмушларини билмасликни баҳона қилиб мунтазам ҳақорат қилган, бир неча бор калтаклаган, уйидан ҳайдаб юборган ҳамда руҳий босим ўтказган.
Аниқланишича, у келинининг ота-онаси билан учрашишини чеклаган, телефондан фойдаланишига тўсқинлик қилган. Айрим ҳолатларда эса уни сочидан тортиб кўчага судраб чиққан, юз ва танасининг турли қисмларига уриб, тан жароҳати етказган.
2025 йил 2 октябрь куни келин узоқ вақт давом этган руҳий ва жисмоний тазйиқларга чидай олмай, яшаш хонадонидаги молхонада ўз жонига қасд қилган.
Жиноят ишлари бўйича Чироқчи тумани судининг ҳукмига кўра, судланувчи Ўзбекистон Республикаси Жиноят кодексининг 103-моддаси 2-қисми «а» банди билан айбдор деб топилган. Жиноят кодексининг 57-моддаси қўлланилиб, унга 5 йил муддатга озодликдан маҳрум қилиш жазоси тайинланди.
