Қизил денгизда танкерларга қилинган ҳужумлардан сўнг нефть нархи 100 доллардан ошди
Трамп ҳусийлар ҳужуми такрорланса, Эронга "ҳарбий жазо" бериш билан таҳдид қилди.
АҚШ президенти Доналд Трамп Қизил денгизда ҳусийлар томонидан Саудияга тегишли икки нефть танкерига уюштирилган ҳужумдан сўнг Эрон ва ҳусийларни "катта ҳарбий жазо" кутаётганини билдирди. Бу ҳақда Reuters хабар берди.
Трамп Truth Social ижтимоий тармоғидаги саҳифасида ҳусийлар Эроннинг вакили эканини таъкидлаб, агар бундай ҳужумлар яна такрорланса, АҚШ бунинг учун Теҳронни жавобгар деб билишини ёзди.
Ҳусийлар ўз кучлари Encelia ва Лайла номли Саудияга тегишли нефть танкерларига ракета ва дронлар билан зарба берганини маълум қилди. Денгиз хавфсизлиги манбалари Encelia кемаси Жизон порти яқинида ракета ҳужумига учрагани ва танкернинг олд қисмида ёнғин чиққанини тасдиқлади. Reuters Layla танкерига ҳужум бўлганини мустақил тасдиқлай олмади.
АҚШ давлат котиби Марко Рубио Эрон тинчлик келишувига рози бўлмагунча унга босим кучайишини билдириб, Теҳрон тўлайдиган "нарх ҳар кеча ошиб боришини" айтди.
Ҳусийлар бу ҳафта Саудия Арабистонига нисбатан денгиз блокадаси жорий этаётганини ҳам эълон қилди. Мутахассислар уларнинг Боб ал-Мандаб бўғозини нишонга олиши глобал нефть ташувларига жиддий хавф туғдириши мумкинлигини қайд этмоқда.
Воқеалар фонида Brent маркали нефть нархи 6 фоиздан ортиқ қимматлашиб, май ойидан буён илк бор бир баррель учун 100 доллардан ошди. Қатор нефть танкерларининг хавфсизлик сабаб йўналишини ўзгартираётгани энергия бозоридаги хавотирларни янада кучайтирмоқда.
Шу билан бирга, Эрон Иордания ва Қувайтдаги АҚШ ҳарбий объектларига зарба берганини маълум қилди. Иордания армияси сўнгги 24 соат ичида учирилган тўртта ракета ва олтита дрондан барчаси, биттасидан ташқари, уриб туширилганини билдирди.
Трамп, шунингдек, Эрон Ҳормуз бўғозида кемаларга ҳужум қилишни давом эттирса, АҚШ Эрон инфратузилма объектларига зарба беришини айтди. Бунга жавобан Эрон ҳарбийлари минтақадаги нефть, газ, электр ва бошқа иқтисодий инфратузилма объектларини нишонга олиши ҳамда нефть экспортини тўхтатишга ҳаракат қилишини маълум қилди.
