Бадахшонда "Толибон" ва Озодлик фронти ўртасида қуролли тўқнашув юз берди
Қуролли тўқнашувлар кучайиши "Толибон" бошқарувидан норозилик, этник вакиллик ва табиий ресурслар билан боғлиқ муаммолар оқибати сифатида баҳоланмоқда.
Афғонистоннинг шимоли-шарқидаги Бадашон вилоятининг Зебак туманида "Толибон" кучлари ва Афғонистон Озодлик фронти (АFF) ўртасида қуролли тўқнашув юз берди.
Аmu ТV хабарига кўра, маҳаллий манбалар жанглар пайшанба куни кечқурун бошланиб, бир неча соат давом этганини билдирган.
Озодлик фронти сиёсий қўмитаси раҳбари Довуд Нажий Х ижтимоий тармоғидаги саҳифасида тўқнашувни "ҳал қилувчи жанг" деб атаб, у янги босқичга ўтганини маълум қилди.
"Толибон"нинг 219-Омар-э-Салис дивизияси ҳам жанг бўлиб ўтганини тасдиқлади. Гуруҳ баёнотига кўра, чегара қўшинлари беш нафар ҳужумчини ўлдирган. Шунингдек, ҳужумчилар Зебак туманига Покистоннинг Читрал ҳудудидан кириб келгани иддао қилинган.
Нашр ҳар икки томоннинг қурбонлар сони ва воқеа тафсилотлари ҳақидаги баёнотларини мустақил равишда тасдиқлай олмаганини қайд этган.
Қайд этилишича, Бадачшонда сўнгги ҳафталарда "Толибон"га қарши қуролли мухолифат фаоллиги кучайган. Аввалроқ Миллий қаршилик фронти ўз жангчилари Яфтал-э-Пайин туманидаги айрим давлат идораларини бир неча соат назорат қилганини маълум қилган эди. "Толибон" бу даъвони расман тасдиқламаган.
Хавфсизлик бўйича таҳлилчилар Бадахшондаги қуролли фаолликнинг кучайишини аҳолининг "Толибон" бошқарувидан норозилиги, бошқарув, этник вакиллик ва табиий ресурслар билан боғлиқ маҳаллий муаммолар билан изоҳламоқда.
