Мактабгача ва мактаб таълимида ўзбек тилини ўқитиш методикаси такомиллаштирилади
180 нафар педагог ўзбек тилини замонавий методика асосида ўқитиш бўйича семинарда иштирок этмоқда.
Мактабгача ва мактаб таълими вазирлиги ҳамда Таълимни ривожлантириш республика илмий-методик маркази ҳамкорлигида ўзбек тилини замонавий методика асосида ўқитишга бағишланган республика ўқув-семинари ўтказилмоқда.
24–28 август кунлари ташкил этилаётган “Мактабгача ва мактаб таълимида ўзбек тилини сифатли ўқитиш: замонавий методика ва инновацион ёндашувлар” мавзусидаги семинарда республиканинг барча ҳудудларидан 180 нафар педагог иштирок этмоқда.
Уларнинг 120 нафари мактабгача таълим ташкилотлари тарбиячилари, 60 нафари эса рус ва қардош тилларда таълим бериладиган мактабларнинг бошланғич синф ўқитувчиларидан иборат.
Тадбир Мактабгача таълим ташкилотлари директор ва мутахассисларини қайта тайёрлаш ва уларнинг малакасини ошириш институтида ўтказилмоқда.
Семинар доирасида мактабгача таълим ташкилотлари тарбияланувчиларининг оғзаки нутқини ривожлантиришга қаратилган “Ўзбек тили” интерфаол таълим платформаси ҳам тақдим этилди.
Семинарда муваффақиятли иштирок этган педагогларга “Миллий ментор” сертификати берилади. Улар семинарда олган билим ва тажрибаларини ўз ҳамкасбларига етказади.
