Қозоғистондаги йирик нефтни қайта ишлаш заводида ёнғин чиқди
Ёнғинни ўчиришга 65 га яқин ходим ва 19 та техника жалб қилинган.
Қозоғистоннинг Атрау нефтни қайта ишлаш заводида ёнғин содир бўлди. Корхона мамлакатдаги учта йирик нефтни қайта ишлаш заводидан бири бўлиб, йилига 5,5 миллион тоннагача нефтни қайта ишлаш қувватига эга.
Корхона матбуот хизматига кўра, 25 август куни механик тозалаш иншоотларининг ёпиқ турдаги тиндиргичида нефть шлами ёниб кетган. Ҳодиса вақтида ушбу объектида иш олиб борилмаган. Ёнғин оқибатида ҳеч ким жабрланмаган, завод эса одатдаги режимда фаолиятини давом эттирган.
Қозоғистон Фавқулодда вазиятлар вазирлиги маълумотига кўра, ёнғин ҳақидаги хабар 12:55 да келиб тушган. 13:42 да ёнғин локализация қилинган ва унинг тарқалиши тўхтатилган. Кейинчалик ёнғин тўлиқ бартараф этилган. Уни ўчиришга 65 га яқин ходим ва 19 та техника жалб қилинган.
Атрау нефтни қайта ишлаш заводи Атйрау вилоятида жойлашган бўлиб, 1945 йилда фойдаланишга топширилган. Корхонанинг асосий эгаси Қозоғистоннинг “КазМунайГаз” миллий нефть-газ компанияси ҳисобланади.
Қайд этилишича, Қозоғистондаги мазкур ҳодиса Россияда ёқилғи тақчиллиги кучайиб бораётган ва Қозоғистон Россия нефтини қайта ишлаш бўйича келишувларга киришаётган бир пайтда юз берди.
