Ҳалок бўлган қутқарувчининг оиласи эътиборсиз қолмади: 3 хонали уй берилди
Янги хонадоннинг калити хизмат вазифасини бажариш чоғида ҳалок бўлган қутқарувчининг яқинларига топширилди.
Қашқадарё вилоятининг Косон туманида хизмат бурчини бажариш вақтида ҳалок бўлган қутқарувчининг оиласига янги хонадон берилди. Бу ҳақда ФВВ хабар берди.
Ўзбекистон мустақиллигининг 35 йиллиги арафасида Фавқулодда вазиятлар вазири, генерал-майор Азизбек Икрамов марҳум оддий аскар Омонтурдиев Элдор Исмоил ўғлининг оиласига барча қулайликларга эга уч хонали хонадон калитини тантанали равишда топширди.
Тадбирда қаҳрамон қутқарувчининг Ватан ва халқ манфаатлари йўлида фидокорона хизмат қилгани, унинг хотирасига ҳурмат ва эҳтиром кўрсатиш муҳимлиги таъкидланди.
Қайд этилишича, янги хонадон марҳумнинг оила аъзоларига кўрсатилаётган эътибор ва ғамхўрликнинг амалий ифодаси бўлди.
Аввалроқ, Президентнинг 22 августдаги фармонига мувофиқ, 15 август куни Тошкентнинг Учтепа туманида ёнғин вақтида фуқароларни қутқариш чоғида ҳалок бўлган ФВВ ходими Бобурмирзо Пардаев ҳамда Фарғона вилоятида хизмат вазифасини бажараётганда маст ҳайдовчи бошқарувидаги автомобиль уриб кетиши оқибатида вафот этган ЙПХ ходими Хайитбек Каримжонов вафотидан сўнг “Жасорат” медали билан тақдирланганди.
