АҚШ Венесуэла билан “тарихдаги энг йирик нефть битими”ни тузди
Трамп битим натижасида АҚШнинг нефть захиралари икки баравардан кўпроққа ошишини маълум қилди.
АҚШ Венесуэладаги 65 миллиард баррелдан ортиқ тасдиқланган нефть захиралари устидан назоратни қўлга киритадиган келишув тузди. Бу ҳақда АҚШ президенти Доналд Трамп маълум қилди.
Трамп келишувни “жаҳон тарихидаги энг йирик нефть битими” деб атади, бироқ унинг тафсилотларини очиқламади. Унинг айтишича, битим натижасида АҚШнинг нефть захиралари икки баравардан кўпроққа ошади, мамлакатда нефть етказиб бериш кўпаяди ва бензин нархлари сезиларли даражада пасаяди.
АҚШ давлат котиби Марко Рубионинг таъкидлашича, келишув Венесуэлага қарийб 100 миллиард доллар хусусий инвестиция жалб қилиш имконини беради. Бу мамлакат иқтисодиётини тиклашга хизмат қилиши кутилмоқда.
Маълумот учун, 2026 йил январида АҚШ Венесуэлада ҳарбий операция ўтказиб, мамлакат президенти Николас Мадуро ва унинг рафиқаси Силия Флоресни АҚШга олиб кетган. Уларга наркотерроризм бўйича айбловлар қўйилган.
Шундан сўнг Венесуэлани аввал вице-президент лавозимида ишлаган Делси Родригес бошқара бошлаган.
