Ўзбекистонга Ҳиндистондан олиб келинадиган гўштнинг ҳалоллиги назорат қилинади
Ўзбекистон мутахассислари Ҳиндистонга бориб, ҳайвонларни сўйиш ва гўштни тайёрлаш жараёнларида иштирок этади.
Ўзбекистон Ҳиндистондан гўшт импортини кенгайтириш ва бу йўналишда қўшма корхоналар фаолиятини ривожлантиришни режалаштирмоқда. Бу ҳақда қишлоқ хўжалиги вазири Иброҳим Абдураҳмонов маълум қилди.
Вазирнинг айтишича, Ҳиндистондаги нисбатан арзон гўштни Ўзбекистон бозорига олиб кириш учун қўшма корхоналар ташкил этилган ва янги келишувларга эришилган.
Гўшт маҳсулотларининг ҳалоллиги ва хавфсизлигини таъминлаш учун Ўзбекистон мутахассислари Ҳиндистонга бориб, ҳайвонларни сўйиш ва гўштни тайёрлаш жараёнларида иштирок этади. Гўшт тегишли халқаро ва ҳалол сертификатлар билан таъминлангач, Ўзбекистонга экспорт қилинади.
Логистика масаласида Туркия орқали, хусусан, Мерсин портидан фойдаланиш бўйича уч томонлама ҳамкорлик йўлга қўйилмоқда.
Шунингдек, Ўзбекистон ва Ҳиндистон ўртасидаги қишлоқ хўжалиги маҳсулотлари савдо айланмаси сўнгги йилларда уч баробардан кўпроқ ошгани қайд этилди.
Айни пайтда Ўзбекистонда ишлаб чиқариладиган 30 дан ортиқ турдаги маҳсулотни Ҳиндистон бозорига экспорт қилиш имконияти мавжуд.
