Лавров Германияни Россияга қарши “ҳақиқий уруш бошлаш”да айблади

Россия ташқи ишлар вазири Сергей Лавров Германияни Россияга қарши “ҳақиқий уруш бошлаш”да айблади. У Германия ҳукуматининг Россия махсус хизматларини Лейпциг/Ҳалле аэропортидаги портловчи моддалар ортилган дрон ҳужумига алоқадорликда айблаганидан кейин Берлинни кескин танқид қилди.

 

“Умуман олганда, бу катта маънода ҳақиқий урушнинг бошланиши. Бонндаги бош консулликни ҳайдаб чиқаришди... Берлиндаги Россия уйини ёпишмоқда. Иккинчи жаҳон уруши, тўғрироғи, Улуғ Ватан уруши бошланишидан олдин немислар ҳам ўз дипломатик ваколатхоналарини ёпганини эслайман... Улар яна урушни хоҳламоқда”, — деди Лавров Россия давлат телевидениесига берган интервьюсида.

 

Россия ТИВ раҳбари Германия канцлери Фридрих Мерцни ҳам танқид қилди. Лавровнинг таъкидлашича, канцлер “Россияга уруш эълон қилиш учун” ҳаракат қилмоқда.

 

“Тарих сабоқлари умуман ўзлаштирилмаган. Маълум бўлишича, неонацизм метастазлари ўзини кўрсата бошламоқда. Бу хавфли ҳодиса. Менимча, Россия раҳбарияти тегишли хулосалар чиқаради”, — деди у.

 

Ўз навбатида, Мерц Москванинг айбловларини рад этди. Германия канцлери мамлакат махсус хизматларининг Россиянинг ҳужумга алоқадорлиги ҳақидаги хулосалари “жуда аниқ, шубҳасиз ва судда қўллаш учун яроқли” эканини билдирди.

 

Унинг сўзларига кўра, Германия расмийлари далилларни текшириш учун атайлаб қарийб тўрт ҳафта вақт сарфлаган.