Мактабларда ҳар душанба куни “Келажак соати” дарслари ташкил этилмоқда

Мактабгача ва мактаб таълими вазирлиги тизимидаги мактабгача таълим ташкилотлари ва умумтаълим мактабларида 2025–2026-ўқув йилидан бошлаб ҳар душанба куни “Келажак соати” дарсларини ўтказиш амалиёти жорий этилган.

 

Қайд этилишича, мазкур машғулотлардан кўзланган мақсад ўқувчиларни миллий ва умуминсоний қадриятлар руҳида тарбиялаш, уларда Ватанга муҳаббат ва садоқат, миллий ўзликни англаш, ижтимоий-эмоционал кўникмалар ҳамда ижобий хулқ-атворни шакллантиришдан иборат.

 

Дарсларга давлат ва жамоат ташкилотлари вакиллари, маданият ва адабиёт соҳаси вакиллари, олимлар, педагоглар, депутатлар ҳамда санъаткорлар жалб қилинмоқда.

 

Шунингдек, малакали эксперт ва мутахассислар иштирокида турли мавзуларда видеоконтентлар тайёрланиб, milliytarbiya.uz платформасига жойлаштирилмоқда. Бугунги кунгача платформага 180 та сценарий асосида 410 та видеоконтент жойлаштирилган.

 

Вазирлик томонидан 2026–2027-ўқув йили учун ҳам “Келажак соати” дастури ишлаб чиқилган. Унда турли ёш гуруҳлари учун алоҳида дарс ишланмалари, сценарийлар, визуал ва интерактив материаллар тайёрланган.

 

Хусусан, 3–7 ёшли мактабгача таълим тарбияланувчилари ҳамда 1–4, 5–8 ва 9–11-синф ўқувчилари учун алоҳида ўқув дастурлари ишлаб чиқилиб, платформага жойлаштирилган.

 

Вазирлик маълумотига кўра, машғулотлар давомида ўқувчилар мавзуга оид маълумотларни ўрганиш билан бирга, ўз орзу-мақсадлари ҳақида фикр алмашиши ва қизиқтирган саволларига жавоб олиши мумкин.

 

Дарсларда тарихда из қолдирган аждодларнинг сиёсат, илм-фан ва маданиятдаги фаолияти, шунингдек, Ватан равнақи йўлидаги фидойилиги ҳақида ҳам маълумотлар берилади.

 

“Келажак соати” дарсларини самарали ташкил этиш мақсадида вазирликнинг ҳудудий бўлинмалари масъул ходимлари, таълим ташкилотлари раҳбарлари ва педагоглар учун ўқув-семинарлари ҳам ўтказиб келинмоқда.