Сербия Ўзбекистон билан баллистик ракеталар ишлаб чиқаришда ҳамкорлик қилишга тайёрлигини маълум қилди
Александр Вучич Сербия узоқ масофага учувчи баллистик ракеталар ишлаб чиқаришни бир йил ичида бошлаши мумкинлигини маълум қилди.
Сербия Президенти Александр Вучич Ўзбекистон билан мудофаа саноати, жумладан, узоқ масофага учувчи баллистик ракеталар ишлаб чиқариш соҳасида ҳамкорлик қилишга тайёрлигини билдирди. Бу ҳақда у 8 сентябрь куни Белградда ўтказилган Ўзбекистон-Сербия бизнес форумида маълум қилди.
Вучичнинг сўзларига кўра, Сербия ҳозирда қисқа масофага учувчи ракеталарни ишлаб чиқармоқда. Мамлакат узоқ масофага учувчи баллистик ракеталарни ишлаб чиқаришни бир йил ичида бошлаши мумкин.
Сербия президенти мудофаа саноатида технологиялар трансфери бўйича ишлар олиб борилаётганини қайд этиб, Ўзбекистон билан ушбу йўналишда ҳамкорлик қилиш имконияти мавжудлигини таъкидлади.
Бизнес форумда Ўзбекистон ва Сербиянинг 200 нафардан зиёд расмийлари ҳамда ишбилармон доиралари вакиллари, шунингдек, йирик саноат ва савдо корхоналари раҳбарлари иштирок этди.
Мазкур форум Ўзбекистон Президенти Шавкат Мирзиёевнинг Сербияга расмий ташрифи доирасида ўтказилди. Ташриф давомида икки мамлакат ўртасида стратегик шериклик муносабатларини ўрнатиш тўғрисида келишувга эришилди.
