Қишлоқ туманларида эҳтиёжмандларни ишга олган корхоналар учун ижтимоий солиқ 2 фоиз бўлади

Президент Шавкат Мирзиёев раислигида ҳудудларда аҳоли бандлиги ва даромадларини ошириш бўйича амалга оширилаётган ишлар муҳокама қилинди.

 

Йиғилишда 3 сентябрь куни ўтказилган видеоселектор йиғилишида белгиланган вазифалар ижроси, ҳудудлардаги штаблар фаолияти ҳамда мавжуд имкониятлардан фойдаланиш ҳолати танқидий таҳлил қилинди.

 

Хусусан, фойдаланилмаётган ишлаб чиқариш қувватларини ишга тушириш орқали бандликни ошириш имкониятлари ҳам кўриб чиқилди.

 

Жумладан, Қўшкўпир туманида 43 миллион еврога қурилган ва 1,3 мингта иш ўрнига мўлжалланган тўқимачилик корхонасининг йил бошидан буён ишламаётгани танқид қилинди. Корхонани банк томонидан кризис-менежер жалб этиш орқали тўлиқ қувватда ишга тушириш мумкинлиги қайд этилди.

 

Шунингдек, 124 та корхонанинг 6 триллион сўмлик активларига қўйилган чекловларни қайта кўриб чиқиш ва уларни банк бошқарувига бериш орқали 10 мингта иш ўрнини тиклаш мумкинлиги айтилди.

 

Оқолтин туманидаги “Оқолтин мега текстиль” корхонаси мисолида банклар балансига ўтган тайёр объектларни қисмларга бўлиб сотиш ўрнига қайта ишга тушириш орқали юзлаб одамларни иш билан таъминлаш мумкинлиги кўрсатиб ўтилди.

 

Умуман, давлат банклари балансида 10 триллион сўмлик қарийб 2,5 мингта мол-мулк мавжуд. Уларни самарали ишга солиш орқали 40 мингтагача иш ўрнини тиклаш имконияти бор.

 

Мутасаддиларга бир ҳафта муддатда қарздорлик сабаб банклар балансига ўтган корхоналарни тўлиқ хатловдан ўтказиш топширилди. Йил якунига қадар ушбу объектларни яхлит ишлаб чиқариш сифатида сотиш ёки менежер тайинлаб, фаолиятини қайта тиклаш чоралари кўрилади.

 

Бундан ташқари, қишлоқ туманларида эҳтиёжманд оилалар аъзоларини ишга қабул қилган корхоналар учун 1 октябрдан ушбу ходимлар бўйича ижтимоий солиқ ставкаси 2 фоиз этиб белгиланади.