Сирдарёда икки ИИБ ходими жиноят содир этиб, қамалди
Улардан бирига 5 йил 1 ой, иккинчисига эса 6 йил 1 ой муддатга озодликдан маҳрум қилиш жазоси тайинланди.
Сирдарёда Ховос тумани ИИБнинг икки собиқ ходимига пора олиш ва далилларни қалбакилаштириш жиноятлари бўйича суд ҳукми чиқарилди. Улар жиноят ишини маъмурий ҳуқуқбузарликка айлантириб бериш эвазига фуқародан 35 миллион сўм талаб қилган.
"Zamon" дастурида маълум қилинишича, воқеа Ховос туманидаги фермер хўжалиги раҳбарининг мурожаатидан сўнг аниқланган. У ер майдонида содир этилган ноқонуний ҳолат оқибатида катта миқдорда зарар етказилгани юзасидан ИИБга мурожаат қилган.
Ўрганишлар давомида гумондор шахс фермерга 30–40 миллион сўм атрофида зарар етказгани аниқланган. Бироқ ИИБнинг икки ходими жиноятни яшириш мақсадида сохта далиллар тайёрлаган.
Улар фермер хўжалиги раҳбарига гумондор зарарни тўлиқ қоплай олмаслигини, ундан 10–12 миллион сўм ундириб беришларини билдирган. Кейинчалик эса гумондорни қўрқитиб, унга 50 миллион сўм зарар етказгани ва бу маблағни тўламаса қамалишини айтишган.
Гумондор дастлаб 24 миллион сўм олиб келган. Ходимлар унинг 12 миллион сўмини жабрланувчига бериб, қолган ҳолат бўйича жиноят иши қўзғатилмаслиги ва иш судда маъмурий тартибда кўрилишини ваъда қилган.
Ходимлар келишилган 35 миллион сўмдан қолган 11 миллион сўмни олаётган вақтда тезкор тадбир давомида қўлга олинган.
ЖИБ Сайхунобод туман суди ҳукми билан собиқ ходимлар пора олиш ва далилларни қалбакилаштиришда айбдор деб топилди. Улардан бирига 5 йил 1 ой, иккинчисига эса 6 йил 1 ой муддатга озодликдан маҳрум қилиш жазоси тайинланди.
Суд шунингдек, шу каби жиноятларнинг олдини олиш юзасидан хусусий ажрим чиқариб, уни Сирдарё вилояти ИИБга юборди.
