Ўзбекистон Қаҳрамони Иброҳим Ғафуров вафот этди
Иброҳим Ғафуров мумтоз адабиёт, фольклор, адабий танқид ва бадиий таржима соҳаларида самарали ижод қилган.
Ёзувчи, адабиётшунос, таржимон ва Ўзбекистон Қаҳрамони Иброҳим Ғафуров 88 ёшида вафот этди. Бу ҳақда Ўзбекистон Ёзувчилар уюшмаси маълум қилди.
Иброҳим Ғафуров 1937 йил 27 декабрда Тошкент шаҳрида ҳунарманд оиласида таваллуд топган. У ўрта мактабни тугатгач, 1956–1961 йилларда Ўзбекистон Миллий университети филология факультетида таҳсил олган.
Меҳнат фаолияти давомида Давлат бадиий адабиёт нашриётида кичик муҳаррир, таҳририят мудири ва бош муҳаррир ўринбосари лавозимларида ишлаган.
Шунингдек, 1982–1995 йилларда “Ўзбекистон адабиёти ва санъати” газетасида бош муҳаррир ўринбосари сифатида фаолият юритган.
Иброҳим Ғафуров мумтоз адабиёт, фольклор, адабий танқид ва бадиий таржима соҳаларида самарали ижод қилган, кўплаб йирик адабий лойиҳалар ва кўп жилдли асарларнинг нашр этилишига муносиб ҳисса қўшган. 2021 йилда „Ўзбекистон Қаҳрамони“ унвони билан тақдирланган.
У 2025 йилда Огаҳий номидаги Халқаро бадиий таржимонлик танловида жаҳон насрини ўзбек тилига таржима қилиш йўналиши бўйича тақдирланган.
Бундан ташқари, у 1995 йилда Миллий тикланиш демократик партияси ташкил этилишида иштирок этган ҳамда кейинчалик партия раиси ва “Миллий тикланиш” газетаси бош муҳаррири лавозимларида фаолият олиб борган.
