1 апрелдан ҳайдовчиларнинг жарима баллари камера орқали ҳам ҳисобланади

2026 йил 1 апрелдан йўл қоидабузарликлари учун жарима баллари мавжуд автоматлаштирилган фото ва видео қайд этиш тизимлари орқали аниқланган ҳолатларда ҳам ҳисобланади. Бу ҳақда Вазирлар маҳкамасининг тегишли қарорида маълум қилинди.

 

Янги тартибга кўра, йўл ҳаракати қоидаларини бузиш ҳолатлари эндиликда фақат Йўл ҳаракати хавфсизлиги (ЙҲX) ходимлари томонидан эмас, балки йўлга ўрнатилган камера тизимлари орқали қайд этилган тақдирда ҳам жарима балларига таъсир қилади. Бу эса ҳайдовчилар масъулиятини ошириш ва қоидабузарликларни камайтиришга қаратилган.

 

Шунингдек, янги қоидага биноан жарима балларини тақсимлаш механизми жорий этилмоқда. Агар транспорт воситасини мулкдори эмас, балки бошқа шахс ишончнома, суғурта полиси ёки йўл варақаси асосида бошқарган бўлса, жарима баллари айнан қоидабузарликни содир этган ҳайдовчига юкланади.

 

Мазкур ўзгаришлар йўлларда интизомни мустаҳкамлаш, адолатли жавобгарликни таъминлаш ва қоидабузарликлар сонини камайтиришга хизмат қилади.