22 минг мигрант АҚШга кириш учун вақтинчалик бошпанада яшамоқда
Бу йил Қўшма Штатлар рекорд даражада қочқин қабул қилиши тахмин қилинмоқда.
22 минг мексикалик мигрантлар АҚШга кириш учун вақтинчалик бошпанада жон сақламоқда. Бу ҳақда CNN телеканали хабар берди.
Бир вақтнинг ўзида Мексика билан чегарадош Техас штатидаги Эль-Пасо шаҳри яқинида маҳаллий ҳокимият чегарада девор қурмоқда. Бундан кўзланган мақсад мигрантлар кириб келишини чеклашдан иборат. Ҳозирда 3.2 километр тўсиқ қурилган.
Қайд этилишича, Эль-Пасода қочқинлар сони ошган. Улар шаҳар кўчаларида тунамоқда, сабаби черков ва қочқинлар марказлари тўлиб кетган.
АҚШда қочқинлик мақомини олиш бўйича сўровлар 2012 йилдан буён 7 марта ўсиб, бу йил 1.6 миллионга етди.
Қўшма Штатларга мигрантлар оқими кучайиши кутилмоқда. бундан олдин коронавирусга қарши кураш баҳонасида мамлакатдан қочқинлар дарҳол депортация қилинган бўлса, ҳозирда ушбу норма юмшатилмоқда. Байден администрацияси уни узайтиришга қарши чиққан.
