Андижондаги чойхонада ёнғин чиқди
Воқеа жойига 5 та ёнғин-қутқарув экипажи юборилган.
Бугун, 21 январь куни Андижон вилоятининг Андижон туманидаги чойхоналарнинг бирида ёнғин содир бўлди. Ҳолат юзасидан Фавқулодда вазиятлар вазирлиги маълумот берди.
Қайд этилишича, соат 14:41 да Андижон туманининг Қўшариқ даҳасида жойлашган чойхоналарнинг бирида ёнғин содир бўлаётгани тўғрисида туман ФВБга хабар келиб тушган. Шунга кўра 5 та ёнғин-қутқарув экипажи соат 14:45 да воқеа жойига етиб бориб, ёнғин соат 14:47 да қуршаб олинган ва соат 15:00 да бартараф этилган.
Ёнғин натижасида чойхонанинг тахминан 70 квадрат метр майдонда томи, шифти ва жиҳозлари ёниб зарарланган.
Ҳодиса оқибатида тан жароҳати олган ва ҳалок бўлганлар йўқ. Ҳозирда ёнғин сабаби ва моддий зарар миқдори аниқланмоқда.
