Ангренда юз берган даҳшатли автоҳалокат қурбонлари сони очиқланди
Ҳукумат комиссияси воқеа тафсилотларини ўрганмоқда.
7 сентябр куни соат 12:20 атрофида Тошкент вилояти, Ангрен шаҳри ҳудудидан ўтувчи А-373 “Тошкент–Ўш” халқаро автомобил йўлида йирик автоҳалокат содир бўлди.
Дастлабки маълумотларга кўра, цемент юкланган юк автомашинасини бошқариб келаётган ҳайдовчи бошқарувни йўқотиб, темирйўл кесишмасида турган икки юк машинаси ва бешта енгил автомобил билан тўқнашган. Тўқнашув оқибатида ёнғин келиб чиққан, у воқеа жойига етиб келган махсус хизматлар томонидан тезкорлик билан ўчирилган.
Бахтсиз ҳодиса оқибатида 7 фуқаро воқеа жойида вафот этган. Шунингдек, 5 киши турли даражадаги тан жароҳатлари билан шифохонага ётқизилган, 4 нафар фуқаро эса дастлабки тиббий ёрдамдан сўнг уйига жавоб берилди.
Ҳодиса юзасидан ҳукумат комиссияси тузилган бўлиб, вазият Бош вазир ўринбосари Очилбой Раматов раҳбарлигида назоратга олинган.
