Ижтимоий тармоқда айрим турдаги автомобилларга газ қуйиш шахобчалари томонидан метан газ нархлари ошилганлиги ҳақида хабарлар тарқалди. Ҳолат юзасидан Монополияга қарши курашиш қўмитаси расмий муносабат билдирди.
Маълум қилинишича, Вазирлар Маҳкамасининг 2022 йил 14 июлдаги 387-сонли қарорига мувофиқ, юридик шахслар учун табиий газ ва электроэнергия учун тарифлар оширилиши вақтинчалик тўхтатилган.
Монополияга қарши курашиш қўмитаси томонидан газ қуйиш шахобчаларида метан гази нархлари оширилганлиги юзасидан тезкор ўрганиш ишлари амалга оширилган.
Ўрганиш натижаларига кўра, Қорақалпоғистон Республикаси, вилоятлар ва Тошкент шаҳрида жойлашган автомобилларга газ қуйиш шахобчаларида бугунги кунда 1 куб м метан газининг нархи барқарор равишда ўртача 2300 сўмдан 2800 сўмгача сотилаётганлиги аниқланган.
“Монополияга қарши курашиш қўмитаси томонидан метан газ нархлари доимий мониторинг қилиб борилаётганлиги ва автомобилларга газ қуйиш шахобчалари метан гази нархларини сунъий равишда оширган тақдирда белгиланган тартибда тегишли чора кўрилиши маълум қилинади”, — дейилади хабарда.
Эслатиб ўтамиз, жорий йилнинг 31 май куни АИ–80 маркали бензиннинг биржадаги нархи 2 фоизга кўтарилгани хабар қилинганди.