Бердимуҳаммедов Хитой вакиллари билан энергетик ҳамкорликни муҳокама қилди
Томонлар нефть-газ соҳасидаги лойиҳаларни кўриб чиққан.
Туркманистон президенти Сердар Бердимуҳаммедов Хитой миллий нефть-газ компанияси (CNPC) президенти Хоу Цицзюнь билан музокара ўтказди. Бу ҳақда “Анадолу” агентлиги хабар берди.
Томонлар “Galkynyş” конининг иккинчи навбатини ўзлаштириш ва Туркманистон-Хитой трансмиллий газ қувурининг тўртинчи тармоғини ётқизилиши масаласини муҳокама қилган.
CNPC президенти Ашхобод билан узоқ истиқболдаги ўзаро манфаатли ҳамкорликдан манфаатдор эканини таъкидлаган.
Туркманистон раҳбари CNPC’нинг энергетика тармоғидаги ҳамкорликдаги ижобий ролини қайд этган. Хоу Цицзюнь Бердимуҳаммедовга 18 июнда очилган “Gadyn” газ тўплаш станциясининг очилишида иштирок этгани учун миннатдорчилик билдирган. У бундан буён ҳам хитойлик ҳамкорларнинг ўз масъулиятларини бажаришда давом этишини маълум қилган.
Аввалроқ Пекин Ашхобод билан энергетик ҳамкорликни кучайтирмоқчи эканлиги тўғрисида хабар берилганди.
