Бухорода балиқчилар табиатга 1,6 млрд зарар етказди
Улар Қизил китобга киритилган ноёб балиқларни овлаган.
Қоровулбозор тумани ҳудудида олиб борилган рейд давомида Жондор туманида яшовчи 4 нафар фуқаро электр қармоқ ёрдамида Ўзбекистон Қизил китобига киритилган 20 дона Туркистон мўйловдори ҳамда 25 дона зоғора балиғини овлагани аниқланди. Улар балиқларни олиб кетаётганида тезкор гуруҳ ходимлари томонидан тўхтатилган. Ушбу ҳуқуқбузарлик натижасида табиатга 1 млрд 603 млн 125 минг сўм зарар етказилган.
"Қизил китобга киритилган 20 дона Туркистон мўйловдорининг ҳар бири учун 26 миллион 250 минг сўм, жами 525 миллион сўм зарар ҳисобланган. 25 дона зоғора балиқнинг ҳар бир донаси учун 375 минг сўм, жами 9 миллион 375 минг сўм зарар ҳисобланган. Балиқлар тақиқланган электр қармоқ ёрдамида овланганлиги учун зарарлар 3 бараварга кўпайтирилган", - дейилади хабарда.
Ҳолат юзасидан тўпланган ҳужжатлар ҳолатга ҳуқуқий баҳо бериш ва тегишли чора кўриш мақсадида прокуратура органларига тақдим этилган.
