Эрдоған: Туркия Украина ғалласи экспорти узилмаслиги учун ҳамма нарсага тайёр
29 октябрда Россия “ғалла келишуви”дан чиқиб кетди.
Туркия Украина ғалласининг дунё бозорига олиб чиқилиши учун қўлидан келган барча ишни амалга оширади. Бу ҳақда Ражаб Тоййиб Эрдоған маълум қилди.
Россия 29 октябрь куни “ғалла келишуви”дан чиқиб кетганини эълон қилди. Бунга Севастополдаги кемаларга уюштирилган ҳужумлар сабаб қилиб кўрсатилган.
Шундан кейин дон ташиш бўйича муаммолар пайдо бўлди. Бугун Туркия, БМТ ва Украина Россия иштирокисиз 12 кемада ғалла олиб чиқишни маълум қилган бўлса-да, буғдой экспорти жиддий камайиб кетиши кутиляпти.
“Украинадан дон ташиш эвазига дунё бозорига 9.3 миллион тонна ғалла олиб чиқишга муваффақ бўлдик. Бу орқали озиқ-овқат инқирози оқибатлари юмшатилди. Бу ҳаракатларни давом эттириш ниятидамиз”, – деган Туркия етакчиси.
