Жорий йилнинг март ойи охирида Тожикистоннинг Душанбе шаҳрида МДҲ мамлакатлари ва Грузия киностудиялари раҳбарлари кенгашининг кинематография соҳасидаги ҳамкорлик бўйича IV йиғилиши бўлиб ўтганди.
Унда Ўзбекистон Кинематография агентлиги ва МДҲ мамлакатлари ўртасидаги ҳамкорликнинг, жумладан, биргаликда кино маҳсулотлари ишлаб чиқаришни ташкил этиш борасидаги ижобий тажрибанинг шаклланганлиги қайд этилган.
“Тожикфильм” киностудияси бош директори Маҳмадсаид Шоҳиёнинг айтишича, қўшма лойиҳаларни амалга ошириш бўйича ҳаракатлар ҳали ҳеч қачон бунчалик жадал тус олмаган.
“Қисқа вақт ичида биз бир қатор ташкилий учрашувлар ва музокаралар ўтказдик. Ҳозирда сценарий муаллифларининг бирлашган жамоаси фильмлар устида ишламоқда”, — деган у.
Йиғилишда, шунингдек, Бош қароргоҳи Тошкентда жойлашган МДҲ давлатлари ва Грузия киностудияларининг Халқаро ижодий уюшмаси ташкил этилган. Ташкилот раиси этиб бир овоздан Ўзбекистон Кинематография агентлиги бош директори Фирдавс Абдухолиқов сайланган.