ISW: Путин ядро зарбасига эмас, узоқ давом этадиган низога тайёргарлик кўрмоқда

 

Америка Урушни ўрганиш институти (ISW) Украинадаги ҳарбий можаро юзасидан навбатдаги ҳисоботини эълон қилди.

 

Экспертларнинг тахминига кўра, Россия Президенти ядро зарбаларига эмас, оддий қуроллар билан узоққа чўзиладиган можарога тайёрланмоқда. Бундан ташқари, асосий эътибор Украинанинг босиб олинган ҳудудларини қўлда сақлаб қолиш ва янги ҳудудларни эгаллашга қаратилади.

 

Бунга Путин томонидан ўтказилган қисман ҳарбий сафарбарлик мисол бўла олади.

 

“Ушбу сафарбарлик унга ички сиёсатда қимматга тушди: юз минглаб одамлар бошқа давлатларга қочиб кетди, мисли кўрилмаган намойишлар бўлди ва Россия ҳарбий-сиёсий доираларининг кескин танқидлари кўпайди. Аммо агар Путинда можарони давом эттириш истаги бўлса, бу товонни тўлашдан маъно бор. У Украинага қўшимча кучлар жўнатиш зарурлигини англамоқда”, – деб қайд этган ҳисобот муаллифлари.

 

Уларнинг фикрича, Россия янги сафарбар қилинганлар билан мавжуд позицияларни сақлаб қолмоқчи. Баҳорда эса анча яхши тайёргарликдан ўтган кучлар билан янги ҳужумларни бошлаш мумкин бўлади.

 

Шу билан бирга Путин совуқ қиш айрим Европа давлатларининг Украинага берадиган ёрдамини қисқаришига олиб келишига умид қилаётгани тахмин қилинган.

 

.