Жанубий Африка президенти Кирил Рамафоса Халқаро жиноий суддан (ХЖМ) Россия президенти Владимир Путинни ҳибсга олмаслик учун рухсат сўради, чунки бу уруш эълон қилиш билан баробар бўлади, деб хабар бермоқда Reuters.
Август ойида Жанубий Африкада Владимир Путин таклиф қилинган BRICS саммити бўлиб ўтади. Рим статутига кўра, Жанубий Африка ҳукумати Россия президентини мамлакатга келган тақдирда Халқаро жиноий суд ордери асосида ҳибсга олиши керак.
Рамафоса бу баёнотни Путин Жанубий Африкага ташриф буюрадиган бўлса, уни ҳибсга олишни сўраган мухолифат коалициясининг унга қарши даъвосига жавобан берди. Бунга жавобан Рамафоса Халқаро жиноий суд билан маслаҳатлашишни бошлаганини айтди.
«Жанубий Африкада президент Путинни ҳибсга олиш ва экстрадиция қилиш тўғрисидаги қарорни амалга ошириш билан боғлиқ аниқ муаммолар бор. Россия ўзининг амалдаги президентининг ҳибсга олиниши уруш эълон қилиш бўлишини аниқ айтди», — деди Рамафоса Reuters агентлигига берган баёнотида.