Сўнгги кунларда айрим оммавий ахборот воситаларида Транспаренсй Интернатионал ташкилотининг 2024 йил учун Коррупцияни қабул қилиш индексида Ўзбекистон 180 та давлат ичида 28 балл билан 126-ўринни эгаллагани ҳақида асоссиз ва расмий манбаларга таянилмаган хабарлар тарқатилмоқда.
Мазкур ҳолат юзасидан Коррупцияга қарши курашиш агентлиги қуйидагиларни расман маълум қилади:
2024 йил 11 февраль куни эълон қилинган сўнгги рейтинг натижаларига кўра, Ўзбекистон 180 та давлат орасида 32 балл билан 121-ўринни эгаллаган. Ушбу кўрсаткич ўтган йилга (2023 йилга) нисбатан ўзгаришсиз қолган бўлсада, сўнгги етти йил ичида мамлакатимиз индексда 37 поғонага юқорилаган.
Транспаренсй Интернатионал таҳлилига кўра, Ўзбекистон Шарқий Европа ва Марказий Осиё минтақасида ижобий ўсиш қайд этган 5 та давлат (Грузия, Молдова, Украина, Косово ва Ўзбекистон) қаторидан жой олган. Сўнгги беш йилликда мамлакат +7 балл, ўн йилликда эса +13 балл кўрсаткични қайд этган.
Шунингдек, индексда баҳолашда паст қолган ёки ўзгаришсиз қолган йўналишлар бўйича халқаро ташкилотларнинг рейтинг манбалари билан бевосита ҳамкорлик ўрнатилган. Транспаренсй Интернатионал тавсиялари асосида Ўзбекистоннинг индексдаги ўрнини яхшилаш учун тизимли ишлар олиб борилмоқда.
Хусусан, бу борада махсус “йўл харитаси” ишлаб чиқилган ва амалиётга жорий этилган.
Қуйидаги муҳим норматив-ҳуқуқий ҳужжатлар қабул қилинди:
- “Манфаатлар тўқнашуви тўғрисида”ги Қонун;
- “Аҳоли ва давлат хизматчиларининг коррупцияга қарши курашиш соҳасидаги билимларини узлуксиз ошириш тизимини жорий қилиш чора-тадбирлари тўғрисида”ги Президент қарори.
Шунингдек, давлат хизматчиларини “Ҳалоллик текшируви”дан ўтказиш, коррупцияга қарши ички назорат тузилмаларининг самарадорлигини ошириш, шунингдек, коррупция ҳақида хабар берган шахсларни ҳуқуқий ҳимоя қилиш механизмларини такомиллаштириш борасида чора-тадбирлар амалга оширилмоқда.
Шу муносабат билан Агентлик оммавий ахборот воситалари вакилларини Ўзбекистоннинг халқаро имижига салбий таъсир кўрсатиши мумкин бўлган, расмий манбалар билан тасдиқланмаган маълумотларни тарқатмасликка, ахборотларни аниқлик билан талқин қилишга ва жамоатчиликка холис ёндашув асосида етказишга чақиради.
Шу билан бирга, Коррупцияга қарши курашиш агентлиги соҳа бўйича олиб борилаётган фаолиятни холис ва ҳаққоний ёритишда ОАВ билан очиқ ва конструктив ҳамкорликка доим тайёр эканлигини билдиради.