КХДРда айғоқчи сунъий йўлдоши яна муваффақиятсиз учирилди

 

Шимолий Кореянинг жосус сунъий йўлдошини орбитага чиқаришга иккинчи уриниши муваффақиятсиз якунланди. Ракета-ташувчининг учинчи поғонасида носозлик юз берди, деб хабар берди Тhе Guardian.

 

Май ойида парвозга биринчи уриниш муваффақиятсиз тугаганди. Ўшанда “Чоллима-1” ракетаси денгизга қулаб тушган.

 

Бу сафар ракетанинг биринчи ва иккинчи поғоналари парвози яхши ўтган, бироқ учинчи босқич парвози вақтида фавқулодда портлаш тизимидаги хатолик туфайли миссия якунланмаган.

 

Жанубий Корея ҳарбийлари Сохе космодромидан учирилган ракетанинг парвозини кузатиб турган ва у муваффақиятсизликка учради, деган хулосага келган.

 

Космик аппаратни учиришга навбатдаги уриниш октябрь ойига режалаштирилган.

 

Японияда тревога эълон қилинди

 

КХДР сунъий йўлдоши сабаб Японияда тонгда фавқулодда огоҳлантириш эълон қилинди. Унда Окинаванинг энг жанубий префектураси аҳолисига ёпиқ жойлардан бошпана топиш тавсия берилди.

 

Тревога эълон қилинганидан тахминан 20 дақиқа ўтгач, Япония ҳукумати ракета Тинч океанига ўтиб кетганини маълум қилди ва тревога тўхтатилди.

 

Жанубий Корея КХДР ҳаракатларини қоралади

 

Жанубий Корея ҳарбийлари сунъий йўлдошни учиришга уринишни провокация ва БМТ Хавфсизлик Кенгашининг Шимолий Кореяга баллистик ракета технологиясидан фойдаланишни тақиқловчи резолюцияларини бузиш сифатида қоралади.

 

Анонимлик шарти билан гапирган америкалик мулозим АҚШ ҳарбийлари Шимолий Кореянинг синовидан хабардор эканини тасдиқлади, бироқ тафсилотларни беришдан бош тортди.

 

Шимолий Корея Миллий аэрокосмик маъмурияти муваффақиятсизлик сабабини текшириш ва тузатиш чораларини кўришини маълум қилди.

 

Ядро қуролига эга КХДР орбитага ўзининг биринчи ҳарбий жосуслик сунъий йўлдошини жойлаштирмоқчи. Келажакда Пхеньян Америка ва Жанубий Корея қўшинларининг ҳаракатини кузатиш учун бутун сунъий йўлдошлар флотини яратишни режалаштирмоқда.