Бугун Кинематография агентлиги томонидан Киночилар уйида 9 февраль ўзбек мумтоз адабиёти асосчиси Алишер Навоий таваллуди муносабати билан “Хасис баққол” анимацион фильми премьера қилинди.
Сценарий муаллифлари Абдулатиф Ҳайдаров ва Рустам Жабборов, режиссёр Абдулатиф Ҳайдаров, аниматор Дилшод Дўстмуҳаммедов, композитор Тоир Асқар, рассом Индира Турсиметова.
Мазкур мультипликация буюк мутафаккир ва шоир Алишер Навоийнинг “Лисон ут-тайр” достонида келтирилган ҳикоя асосида бўлиб, қаҳрамонлар шакл-шамойили Шарқ миниатюра санъати, хусусан Камолиддин Беҳзоднинг ижод намуналари асосида яратилган.
Премьерадан сўнг, болажонлар учун байрам табриклари ташкил этилди. Навоий ижодидан намуналар айтилди. Фаол иштирокчиларга эсдалик совғалари тақдим этилди.
Маълумот учун: 14 февраль Заҳириддин Муҳаммад Бобур таваллуди муносабати билан Киночилар уйида "Йўлбарснинг туғилиши" фильмининг намойишлари ўтказилади.
Эслатиб ўтамиз, аввалроқ ўзбек мультфильми халқаро фестивалда иштирок этгани ҳамда Ўзбекистон, Қозоғистон ва Россия ҳамкорлигида Хўжа Насриддин ҳақида мултфильм суратга олиниши ҳақида хабар берилганди.
Чўлпоной Аҳмедова тайёрлади.