Олмаотага автомобилда кириш чекланиши мумкин
Тирбандликни камайтириш учун автомобилларга тўлов тизими жорий этилади.
Қозоғистоннинг Олмаота шаҳри автомобиль тирбандлигини камайтириш ва ҳаво сифатини яхшилаш мақсадида транспорт ҳаракати бўйича янги тартибларни жорий этиши мумкин. Шаҳар ҳокими Ерболат Досаевнинг сўзларига кўра, 2025–2027 йилларга мўлжалланган дастур доирасида автотураргоҳ нархлари сезиларли даражада оширилади ва марказга шахсий автомобиллар билан кириш чекланади.
Ҳоким бу чора бошқа йирик шаҳарлар, жумладан Ню Ёрк тажрибасига асосланганини таъкидлади. У ерда транспорт тизимига тегишли тўлов жорий этилганидан сўнг марказий ҳудудлардаги автомобиль ҳаракати 20 фоизга камайган. Олмаотада ҳам 2027 йилдан бошлаб шунга ўхшаш чекловлар жорий этилиши мумкин.
Янги тартибга кўра, замонавий экологик стандартларга жавоб бермайдиган автомобиллар шаҳарга пуллик тартибда киради, бироқ электромобиллар ва экологик тоза транспорт воситаларига бу чекловлар таъсир қилмайди.
2025 йил кузидан бошлаб Олмаотада интеллектуал транспорт тизими (ИТС) жорий этилиши режалаштирилган бўлиб, у орқали шаҳар кириш жойларида назорат кучайтирилади. Шунингдек, 2024 йил давомида шаҳарда янги коммунал автотураргоҳлар барпо этилиши кўзда тутилган. Бироқ мутахассислар бу ўзгаришлар тирбандлик муаммосини тўлиқ ҳал қила олмаслигини таъкидламоқда.
